مين طفا النور؟!!

قاعدة -1-

"لازم تكون شاطر ف العربي ومتفوق في الانجليزي علشان هتدرس باللاتيني"

-3-

في الصباح الباكر انطلق ممتاز من منزله بصحبة صديقه مرتضي في طريقهما الي الكلية. ارتدي ممتاز البدلة التي اشتراها خصيصاً لأول يوم له بكليه الطب والتي تسلمها بالأمس من عم عبده المكوجي بعد توصية خاصة جدا بكيّها. اما مرتضي فلم يشأ أن يبالغ في مظهره فارتدي قميص وبنطلون عاديين.

"تفتكر هناخد ايه النهاردة يا مرتضي"

"مش عارف بس أكيد مش هناخد حاجات كتير"

"انت عارف انا نفسي ناخد ايه"

"ايه يا ممتاز"

"نفسي ناخد اشعة او رسم القلب ,نفسي افهم بيشوفوا ايه في صورة الأشعه نفسي اعرف الخطوط اللي في رسم القلب دي معناها ايه "

"لا يا ممتاز ما اعتقدش من اول يوم كدة ناخد الحاجات دي بس انا سمعت اننا هندخل المشرحة , تخيل بقي نفسك قدام الجثة ولا أجدع فيلم رعب"

"جثة..جثث ايه هو احنا دكاترة ولا حانوتية لا لا دي اشاعات"

سكت ممتاز وهو يفكر في موضوع المشرحة ولا يعرف لماذا شعر بانقباض في صدره.

وما ان وصلا مبني الكلية وسألا عن مكان المدرج وأرشدهما أحد الزملاء حتي شهق كل منهما نفس الشهقة وان كانتا لاسباب مختلفة.

أما ممتاز فقد رأي ما لم يكن يتوقعه بالمرة حتي انه شعر انه قادم من كوكب اخر وقال في نفسه "يا أرض انشقي وابلعيني", فلم يكن يتصور ان طلبة كلية طب يرتدون الملابس العادية يرتدون الكاجوال ويذهبون الي الكلية دون أن يروا في ذلك مشكلة , ولم يكن يتصور أنه سيري في كليته "الجينز" و "الواد ابو جل في شعره" , وتي شيرتات ال "النايكي" وكوتشيات "أديداس وبوما" والملابس الأخري العادية البسيطة وحتي الفتيات كأي فتيات اخريات يراهن مع اختلاف طريقة كل منهن في ارتداء ملابسها..

وقف ممتاز في مكانه مذهولاً فاتحاً فاه فحسب للحظة انه دخل عن خطأ "نادي الجزيرة" وفي خلسة خلع جاكت البدلة حتي لا يكون محط الأنظار..

اما مرتضي فكانت شهقته لشيء اخر شهق لمنظر المدرج من امامه , فلم يكن أبداً يتوقع أن يري كل هذا العدد الهائل من الطلبة بمدرج واحد بكلية الطب , حتي أنه حسب في البداية ان هذه المحاضرة يحضرها الطلبة من كل الدفعات وليست دفعته فقط.

بعد لحظات من الاندهاش والشهقات والحملقة , نظر ممتاز الي مرتضي وقال له

"طيب ما الناس لابسين عادي اهو زي البشر العاديين يعني, امال ايه اللي انا عامله في نفسي ده , وانا اللي كنت فاكر هلاقي السموكن اجي الاقي النايكي"

ضحك مرتضي ضحكة لم تخلُ من السخرية من صديقه واجابه

"يا ابني مانا قلتلك الكلام ده كان زمان ما صدقتنيش , انت فاكر نفسك جاي تناقش الدكتوراه , طلبة عايزهم يلبسوا ايه يعني, انا اللي مستغربله بس ان كل الناس دي معانا في الدُفعة داحنا طلعنا كتير أوي"

"أيوة صحيح عندك حق , كل دول دفعة واحدة , وكل دول دكاترة بيتخرجوا كل سنة ومن كليتنا بس , اتاري الدكاترة مابقوش لاقيين شغل بس العلم اتقدم يا رجالة وكلية الطب بقت اخر روشنة"

وضحك كل منهما علي منظرهما وسط المدرج وذهبا يبحثان عن مكان وسط هذه الجموع.

قطع ضحكاتهما صوت الدكتور , الذي اخذ يرحب بالطلبة الجدد ويتمني لهم دراسة سعيدة ثم اخذ يلقي عليهم بعض النصائح والتعليمات والمواعظ والحكم و..فجأة بدأ في التفوه بكلمات لم يفهم منها ممتاز ومرتضي شيء , فنظر كل منهما الي الاخر ثم نظرا الي الطلبة من حولهم وأخيرا نظرا الي الدكتور وعلي وجه كل منهما تعبير من يحاول التظاهر بانه فاهم وهو لا يفقه شيئا مما يسمعه.

وهكذا انقطع الارسال ولم يعد الا عندما قال الدكتور

"أشوفكم بكرة ان شاء الله"

فأدرك ممتاز ومرتضي ان المحاضرة انتهت فنظر ممتاز الي مرتضي وسأله محاولا اثبات انه ليس الغبي الوحيد بالمحاضرة وان العيب ليس منه

"هو فيه ايه, الدكتور دا كان بيقول ايه , كان ماشي كويس في الأول وبعدين ايه اللي حصل مين طفا النور"

فاجابه مرتضي

"هو تقريباً كان بيشرح حاجة في المنهج"

فقال ممتاز ساخراً

"دا انجليزي دا يا مُرسي"

"والله يا ممتاز علمي علمك"

خرج ممتاز ومرتضي من المحاضرة يضربان كفاً بكف , ويشعران بسحابة من الغباء تغطيهما , الي ان انقشعت تلك السحابة عندما سأل أحد الزملاء

"لو سمحت هو الدكتور دا كان بيشرح مادة ايه؟!"

وهنا سقط ممتاز ومرتضي من الضحك حتي احمّر وجه الزميل خجلا عندما شعر بانهما يسخران منه , ولما لاحظ ممتاز ذلك ربت علي كتفه وقال وهو يحاول تمالك نفسه من الضحك

"معلش يا أخ اصل احنا كنا حاسين اننا الاتنين الاغبياء الوحيدين اللي في المدرج بس واضح ان العدوي منتشرة"

قالها وانفجر مرة أخري في الضحك وانفجر معه مرتضي والزميل الذي تركاه يضحك كالمجنون امام باب المدرج.

في طريق العودة لم يتفوه أيا منهما بكلمة وانما بين الحين والحين يختلس كل منهما نظرة الي الاخر ويضحك. فاليوم لم يكن كما توقعا ابدا. فحتي عندما وصل ممتاز الي منزله ووجدته أمه في حالة من السعادة الغير معتادة فسألته بطيبتها المعتادة

"هم كانوا بيوزعوا عليكم زغازيغ في الكلية ولا ايه يا ممتاز"

ضحك ممتاز علي ضحكه وقال لها

"لا أبدا يا ماما أصلنا اخدنا النهاردة محاضرة حلوة اوي يا ريتك حضرتيها معايا"

فسألته أمه التي لا تزال في حيرة من ضحكات ابنها الغريبة التي تحولت لهستيريا من الضحك

"ودي كانت محاضرة نكت بقي ولا ايه اللي تخليك عامل كدة؟"

"لا ..لأ ابدا يا ماما دي كانت محاضرة ااااا.. محاضرة ااااا..اه كانت محاضرة طب"